កុំថាឡើយអ្នកតូចតាចទោះជាអ្នកត្រកូលផុតលេខក៏គេចស្លាប់មិនរួចដែរ
ថ្ងៃសុក្រ ទី៧ ខែកក្កដា ឆ្នាំ២០១៧ ម៉ោង ១៨:៤៤ (07-07-2017 18:44)
ផ្អែកតាមទ្រឹស្តីព្រះពុទ្ធសាសនាបានបង្ហាញថា បើទោះជាមនុស្សខ្លះកើតមកក្នុងត្រកូលខ្ពង់ខ្ពស់ ខ្លះមានត្រកូលវណ្ណៈកណ្តាល ខ្លះសិ្ថតក្នុងត្រកូលតូចទាប អ្នកខ្លះមានអំណាចវាសនាច្រើន មនុស្សខ្លះមានអំណាចវាសនាតិច...ខុសគ្នាយា៉ងនេះក្តី ប៉ុន្តែសត្យានុម័ត៣យា៉ងដែលមនុស្សគ្រប់រូបមិនបែកផ្សេងគ្នាទេពោលគឺមានស្មើទូទៅគ្រប់ៗគ្នា អ្នកណានឹងកន្លងផុតទៅមិនបានជាដាច់ខាតនោះគឺ សាមញ្ញលក្ខណធម៌ ឬហៅថាត្រៃលក្ខណ៍ ។
មុននឹងបកស្រាយនូវចំណុចទាំងបីនេះ អ្នកសិក្សាគប្បីជ្រាបនូវពាក្យថា «សង្ខារ» ជាមុនសិនដើម្បីភ្ជាប់សេចក្តីនេះទៅនឹងសាមញ្ញលក្ខណធម៌ដូចតទៅ ។ ពាក្យសង្ខារប្រែថា ការតាក់តែង គ្រឿងប្រកប ភ្ជុំ ប្រមូលផ្សំ របស់ដែលផ្សំផ្គុំអំពីធាតុដូចរាងកាយ ដើមឈើ ឬរបស់ដែលមនុស្សផ្សំផ្គុំអំពីសម្ភារដូចយានយន្ត គេហដ្ឋានប៉ុណ្ណេះជាដើមឈ្មោះថាសង្ខារ ដែលពោលជារួមគឺអ្វីៗទាំងពួងទាំងឡាយក្នុងលោកនេះដែលជាបច្ច័យតាក់តែងឡើងឈ្មោះថាសង្ខារ ។ សង្ខារនោះចែកចេញជា២ប្រការគឺ ឧបាទិន្នកសង្ខារ បានដល់ពួកសត្វដែលផ្សេងគ្នា ដោយកំណើតជាទេវតា មនុស្ស អមនុស្ស និងតិរច្ឆាន ព្រោះពួកសត្វអម្បាលនេះក៏មានហេតុបច្ច័យមានកម្មជាដើមតាក់តែងឱ្យកើតឡើងហើយមានចិត្តដឹងសុខទុក្ខ និងអនុបាទិន្នកសង្ខារ បានដល់របស់ដែលមាននៅតាមធម្មតាជាវត្ថុឥតវិញ្ញាណដូចដើមឈើ ភ្នំ ទន្លេ គេហដ្ឋាន យានយន្តជាដើម ព្រោះរបស់អម្បាលនេះមានហេតុបច្ច័យតាក់តែងឡើងដូចគ្នា គ្រាន់តែគ្មានចិត្តដឹងសុខទុក្ខ ក្តៅត្រជាក់ប៉ុណ្ណោះ ។
ព្រោះហេតុនោះហើយទើបលោកពន្យល់ពាក្យថា សាមញ្ញលក្ខណធម៌ ធម៌កើតមានជាធម្មតាជាលក្ខណៈ គឺមានស្មើទូទៅដល់សង្ខារទាំងពួងដូចជាតិជាមនុស្ស សូម្បីនឹងមានឋានៈផ្សេងគ្នា គឺមនុស្សខ្លះជាសេដ្ឋី អ្នកខ្លះជាគហបតី មនុស្សខ្លះជាស្មូមយាចក មនុស្សខ្លះមានបុណ្យស័ក្តិធំ មនុស្សខ្លះគ្មានស័ក្តិយសក៏ពិត មែន ប៉ុន្តែមានលក្ខណៈ៣យា៉ង ដែលមនុស្សគ្រប់ៗរូបមិនបែកផ្សេងខុសគ្នាឡើយ គឺមានស្មើទូទៅគ្រប់គ្នា អ្នកណានឹងកន្លងផុតទៅមិនបាន នោះគឺសាមញ្ញលក្ខណធម៌នេះឯង ។
លក្ខណៈធម៌៣យា៉ងនេះប្រចាំនៅជាគូនឹងគ្នាជាប់ជានិច្ច ៖
១-អនិច្ចតា សភាពជារបស់មិនទៀង ទោះថោកទាបក្តី ថ្លៃថ្លាក្តី កើតឡើងហើយរមែងរលត់ទៅវិញជាធម្មតា ។
២-ទុក្ខតា សភាពជាទុក្ខ គេរមែងកំណត់យា៉ងនេះថា ការកើត ចាស់ជរា ព្យាធិ មរណៈ ជាប្រភេទនៃទុក្ខដែលមនុស្សគ្រប់រូបមិនអាចកន្លងបាន ចង់មិនចង់ត្រូវតែទទួល ។
៣-អនត្តតា សភាពមិនមែនជាម្ចាស់របស់ មិនលុះក្នុងអំណាចនៃចិត្ត មិនស្តាប់បង្គាប់អ្នកណា ឬថាមិនមែនជារបស់ខ្លួន កាលបើដល់ពេលវេលាហើយ អនត្តាទាញយកទៅភ្លាម ៕
(ឈ្វេងយល់ឱវាទព្រះពុទ្ធសាសនាចេញផ្សាយសម្រាប់ថ្ងៃសីល ១៥កើត ខែអាសាឍ)
លក្ខណៈធម៌៣យា៉ងនេះប្រចាំនៅជាគូនឹងគ្នាជាប់ជានិច្ច ៖
១-អនិច្ចតា សភាពជារបស់មិនទៀង ទោះថោកទាបក្តី ថ្លៃថ្លាក្តី កើតឡើងហើយរមែងរលត់ទៅវិញជាធម្មតា ។
២-ទុក្ខតា សភាពជាទុក្ខ គេរមែងកំណត់យា៉ងនេះថា ការកើត ចាស់ជរា ព្យាធិ មរណៈ ជាប្រភេទនៃទុក្ខដែលមនុស្សគ្រប់រូបមិនអាចកន្លងបាន ចង់មិនចង់ត្រូវតែទទួល ។
៣-អនត្តតា សភាពមិនមែនជាម្ចាស់របស់ មិនលុះក្នុងអំណាចនៃចិត្ត មិនស្តាប់បង្គាប់អ្នកណា ឬថាមិនមែនជារបស់ខ្លួន កាលបើដល់ពេលវេលាហើយ អនត្តាទាញយកទៅភ្លាម ៕
(ឈ្វេងយល់ឱវាទព្រះពុទ្ធសាសនាចេញផ្សាយសម្រាប់ថ្ងៃសីល ១៥កើត ខែអាសាឍ)
Like our Page 
No comments:
Write comments